لازم تحبها

تصدقو ان انا اكتشفت ان انا بحب البلد اوي ..بكتشف فيها ميزات جميله اوي.. فكرت ليه الناس اللى احنا بنسميهم سياح" واللي هي جمع سايح وسايحه " ليه بييجو هنا كتير وبيتمتعو اوي وبييجو تاني وطايرين من السعاده والدهشه... قلت يمكن البلد حلوه وانا معرفش!!!.. سيبك م الاهرامات... مصر بس اللي تمشي على كوبري قصر النيل ومعاك حبيبتك او صاحبك او حتى لوحدك والهوا يطيرك من مكانك وريحه النيل المعروفه داخله في مناخيرك عاملالك دماغ سمك .. تمشي وتنزل التحرير تقعد عند تمثال عمر مكرم عند الجامع وفي ايدك كانز بيبسي ماكس وبتتفرج على اعلان كوكاكولا اللي من غيره متبقاش التحرير تحرير .. ازازه كوكاكولا بتصب في كوبايه وكلمه كوكاكولا بتلعلع بالعربي والانجليزي فوق الازازه .. تتمشي لحد طلعت حرب وتاكل لك ساندوتشين فول وطعميه من عند فلفله اوساندوتش زعتر من دار القمر او تضرب لك طبق كشري من عند ابو طارق "ادفع قبل الاكل" او ساندوتش كفته بجنيه ونص من عند ابو خالد !!.. مول طلعت حرب بهدومه العجيبه .. شارع الشواربي والعيال تشدك بالعافيه عشان تشتري .. تتفرج على السينيمات في وسط البلد .. تقف على كوبري مايو وتشوف القاهره مقسومه نصين بيفرق بينهم الكوبري ..النص اليمين فيه النيل هيلتون وشيراتون والجزيره والنادي الاهلي والدقي والزمالك وجاردن سيتي وشارع القصر العيني والتحرير ووسط البلد والبرج والفور سيزون وسميراميس والفلل والعمارات العاليه .. والشمال فيه بولاق ابو العلا والمؤسسه وشبرا الخيمه ووكاله البلح والعشوائيات وبيوت الغلابه..تنزل شارع الهرم وتقعد قدام كايرو مول وتتفرج على مخروط الشاورمه الكبير زياده عن اللزوم وطعمه مش اد كده .. مصر فيها مدينه نصر وفيصل وصفت اللبن والزمالك وبولاق الدكرور وشارع الالفي والدرب الاحمر والقلعه والسيده عيشه .. فيها نضافه جاردن سيتي وفيها انوار السيده وسوق الاتنين والجمعه ..فيها رمضان بشكل تاني والتحضير ليه احلي منه .. فيها مولد النبي والسيده والحسين وناس تيجي تقعد بشكل عشوائي تسد المنطقه .. فيها موالد عمرك ما تسمع عن صحابها .. فيها البيت بيتك ووسط البلد والقصه وما فيها وحديث المدينه وليلتي وضي القمر واحلي ما عندنا وهاله شو .. فيها عادل امام وهاني رمزي وهنيدي وامينه رزق والفخراني ونور الشريف ومحمود مرسي ومحمود حميده ومحمود عبد العزيز ومني زكي وعبله كامل .. فيها الاهلي وانبي والزمالك والاسماعيلي .. فيها الحب والكره والحقد والحسد والموده والطيبه والتدين والتسيب والتشدد والادب وقله الادب والذوق والنتانه والطريق المستقيم والوساخه والصياعه والتناكه والجدعنه والتلكيك والاتامه والانانيه واللي فوق واللي تحت .. فيها الزباله والوساخه والاسفلت والطوب والتراب .. فيها اسكندريه وشرم والغردقه وسفاجا وفيها الاقصر واسوان و اسيوط وقنا وسوهاج والمحله ...فيها منيروالحجاروتامر وانغام وفيها ام كلثوم وحليم وعبد الوهاب..[/b]

بتفكرنى بحد هنا كلنا عارفينه
دايما يقول بصو للجزء الحلو من الشئ وانسى الوحش
هتبقى مبسوط
وميرسى يا احمد على الموضوع الجميل ده