شاطر قوى...وكمان مختلف!

لازم ولابد وضرورى جدا انك تبقى شخص مختلف...ليك بصمتك فى الحياة عادات خاصة بيك لوحدك محدش تانى يشاركك فيها
الناس تعرفك من اسلوبك المميز وطريقتك اللى مش شبه حد تانى...لازم تكون نفسك بس....اوعى تنبهر بحد وتعيش طول حياتك
نفسك تقلده كده مش هتكون...اوعى كمان تتوه وسط الزحمة وتبقى واحد زى ميت الف عايشين حواليك.. خليك دايما مركز فى تفاصيل
صغيرة تضمن لنفسك فيها اختلاف عن كل الناس اللى حواليك..
ركز كده وقول بصوت عالى انت بتحب ايه وبتكره ايه؟؟
ايه الحاجة اللى مفيش حد زيك فيها لبسك ولا شكلك ولا عاداتك ولا افكارك المختلفة ولا طقوس خاصة بيك لوحدك؟....
بتقوم الصبح بتعمل ايه؟؟....بتقعد فى السرير شوية لحد ما تفوق وتشرب سيجارة على الريق وتستنى ولا بتشغل الكاسيت
وتسمع اغنية بتحبها اوى عشان مودك يتظبط؟؟....
بتشترى هدومك من اى حتة ولا ليك محل معين بتحب افتكاساته بتقعد على اى قهوة تقابلك والسلام لما تكون زهقان ولا ليك
قهوة معينة معروف وسط زباينها واصحابها عارفينك زى ما هما عارفين عيالهم؟؟؟؟.....
بتحب ممثل معين ولا بتتفرج على اى فيلم وخلاص لما بتحب تروح سينما ...ليك مواصفات معينة فى فتاة احلامك ولا سايبها
للظروف وترشيحات الحاجة والدتك لما تنوى تتجوز؟؟؟ عايز تكون فى المستقبل شخص عادى بيشتغل وبيجيب فلوس ولا ليك
مزاج تفكر انت هتعمل ايه وهتفيد الدنيا اللى لقيت نفسك وسطها ازاى؟
محتاج كل خمس دقايق حد يدلك تعمل ايه ولا قرارك دايما من دماغك مهما كانت النتيجة...لازم تجاوب على الاسئلة دى دايما
وتحطها قدام عينك عشان تحس انك مش شخص عادى...اوعى الغرور يركبك وتحس انك احسن من اى حد...
حس بس انك مختلف عن اللى حواليك وان ليك طعم ولون وشكل مميز عنهم...
اوعى تكون واحد وسط القطيع ملامحك زى ملامحهم وشكلك نسخة منهم...بص كده لطابور شباب الجامعة وانت هتشوف
ايه القصد من كل الكلام ده...ساعات كتيرة بتحس انك فى الصين مثلا كل الشباب زى بعض وكل البنات شكل بعض حتى فى
طريقة اللبس...خلى الناس تشاور عليك من بعيد لان فيك حاجة مميزة ان شا الله حتى كوفية غريبة ...اوعى تبقى شخص شاذ
لان مش ده الاختلاف...خليك طبيعى بس مختلف...فى ضحكتك ونظرتك وتفكيرك وسرحانك وميولك وهواياتك...ابهر الناس
اللى حواليك عشان يحبوك دايما لانك مش زى اى حد واكيد دايما هايحتاجولك عشان يثبتو ان الدنيا ملهاش طعم غير باختلافها


ســـاره