احلى من الهدية طريقة تقديمها

الهدية فى محتواها رمز للتعبير عن المشاعر وعمر الهدية ما كانت بتمنها ولا بشكلها
الهدية بوقتها وخاصة لو كانت مفاجأة..
المشكلة ان كتير من الهدايا دلوقتى بقت تأدية واجب واتحولت مع الوقت لنوع من
ممارسة التقليد دون طعم او لون واحيانا اخرى قد يصرف البعض من وقته ونقوده لاختيار
هدية غالية من غير ما يفكر اذا كانت مناسبة لذوق وميول الشخص التانى ولا لأ
واللى يهمنا فى الموضوع هو ان الهدية وطريقة تقديمها ممكن تبقى مؤشر قوى
وحقيقى على الشخصية ..حاول تعرف معانى شخصية الانسان اللى بتحبه
من خلال هديته.
-يعنى لو كان بيحب المظاهر هتلاقيه بيختار هدية غالية جدا ويقعد يتباهى ويتفاخر بيها
-لو كان من النوعية المنافقة هيقدم الهدية علنى عشان يقول للناس انه بيعرف فى الذوق
-لو كان شخصية كريمة هتلاقى هديته بسيطة لكن معبرة
-لو كان من اصحاب الشخصية المتحذلقة هتلاقيه عمال يوصف هديته وازاى انها تعبر عن
مشاعره ويقعد يقنعك بأهمية الهدايا فى استمرار الحب والكلام الرغى ده!
-صاحب الشخصية المميزة هتلاقى هديته مميزة فى وقتها وشكلها وطريقة تقديمها
وهتقول اكتر من اللى هو هيقوله