حادى بادى مراتك ولا شغلك؟؟

الموضوع جد شوية ولازم تفكر فيها سواء بالطريقة اللى احنا هنقولها او بطريقتك الخاصة جدا
لان طبعا زى ما اتفقنا كل واحد وظروفه..
الموضوع باختصار فرق جديد وكبير قوى بين مراتك وبين شغلك..ياترى قبل ما نقول
مين احسن مراتك ولا شغلك انت ايه رأيك؟؟
لو مش عارف تفكر ايه رأيك احنا هنقولك..بصراحة يعنى ومن غير زعل الشغل اجدع
ميت مرة من مراتك وللاسباب الاتيه:
اولا:الشغلبيصرف عليك-لكن سعادتك بتصرف على مراتك!
ثانيا:فى الشغل ممكن تزعق براحتك وزعيقك كمان يجيب نتيجة..مع مراتك الحكاية صعبة
قوى مش هتقدر تزعق ولو كررت زعيقك مش هيجيب اى نتيجة!
ثالثا:ممكن تزوغ من الشغل فى اى وقت من غير ما حد ياخد باله او حد من الزملا يغطى
غيابك انما تزوغ من مراتك..هيهات يا معلم!انسى يا عمرو!
رابعا:فى الشغل عندك مدير ممكن ترضيه لو اشتغلت كويس وانما مع مراتك لو عملت
قرد مش ممكن ترضيها واذا رضيت عنك هتلاقى حماتك اللى عمرها ما هترضى عنك ابدا!
خامسا:فى الشغل من حقك تاخد اجازة..عندك عارضة واعتيادى ومرضى ده غير يوم
الجمعة طبعا والعطلات الرسمية..بصراحة الشغل مهما كان فهو ريحته خفيفة على القلب
انما مع مراتك مش ممكن تاخد اى اجازة بالعكس ده انت لازم تلزق فيها يوم اجازتك والا يبقى
وشك ملوش ملامح-باختصار عندك اجازة واحدة وطويلة جدا!!!
سادسا:فى الشغل ممكن تترقى واتخد منصب كبير والناس تشاور عليك وتقول يا باشا
ويبقى عندك مكتب لوحدك وفراش وسكرتيرة خاصة والكل يضرب لك تعظيم سلام
فى البيت هتعيش طول عمرك زوج وتموت زوج واللقب الوحيد اللى مكن تاخده
لما تنادى عليك مراتك يا ابو العيال..او يا حاج ولما تعجز وتسلم نمرتك تقولك يا بركه!!
سابعا:الشغل لو زهقت منه او ملقتش نفسك فيه ممكن جدا تسيبه وتدور على شغل تانى
وبسهولة..انما مع مراتك لو روحك طلعت لازم تحط فى بقك كوتشى اميجو بينور
وتفكر مليون مرة فى المحاكم والمؤخر والعيال والنفقة وتلاقى نفسك طالع من الاخر بتغنى
انا اللى استاهل كل اللى يجرالى الغالى بعته رخيص ولا احسبووووش غالى(قصدك العزوبية طبعا)
ثامنا:فى الشغل لو سبته او بلغت سن المعاش بتاخد مكافأة نهاية الخدمة ومعاش وحفلة تكريم
انما مع مراتك لو سيبتها هتدفع كل اللى حيلتك وممكن تتسجن كمان!!
تاسعا:ممكن تغير شغلك وتنتقل لغيره لو لقيت شغل احسن منه فى حين انك طول الوقت
بتشوف بنات احلى ميت مرة من مراتك بس متقدرش تغيرها...ظلم طبعا!!
عاشرا:فى الشغل متأمن عليك عشان لو حصلك اى حاجة-ولو لا قدر الله حصل لك حاجة
مراتك هى اللى هتقبض التأمين